Kryetari i Prishtinës i përgjigjet Partisë së Drejtësisë: Anulon BeerFest’in


  1. Pas incidentit të mbrëmshëm në BeerFest dhe kërkesës së Partisë së Drejtësisë për të mos lejuar festivale të birrës në sheshet e Prishtinës ka reaguar Shpend Ahmeti. Ky i fundit ka vendosur të ndalojë dy ditët e ardhshme të këtij festivali.
    Ahmeti ka shkruar në Facebook se pas ndodhisë së mbrëmshme janë anuluar edhe dy netët e ardhme të Beerfestit të parapara të mbahen të shtunën e të dielën.

“Të nderuar qytetarë,

Prishtina si kryeqytet është nikoqire e organizimeve të shumta argëtuese, ekonomike e politike. Detyra jonë ka qenë gjithmonë që të gjejmë një balancë në mes të argëtimit, lirisë dhe qetësisë e sigurisë publike.
Kërkesat më të shpeshta janë për organizime në shesh të cilat jo rallë i refuzojmë.

Beerfest është një prej organizimeve më të mëdha dhe më të suksesshme që ka Prishtina në vitet e fundit. Edhe këtë vit në diskutime me organizatorët kemi ngritur brengat tona me disa çështje të cilat organizatorët kanë marr masa ti adresojnë.

Mirëpo numri i madh i njerëzve mbrëmë ka tejkaluar të gjitha kapacitetet organizative dhe ka shpërfaqur disa probleme substanciale. Kryesoret kanë qenë mungesa e kapacitetit për të garantuar sigurinë nga ana e organizatorëve për shkak te numrit të madh të njerëzve dhe prania e madhe e minorenëve (nën 18 vjeç) në shesh.

Për këto arsye kam vendosur që të revokojmë lejen e Beerfest per sot e nesër. Ky vendim jo i lehtë merret pas takimeve me organizatorët, policine dhe drejtoritë përkatëse”, ka shkruar Ahmeti në Facebook.