Veseli: Askush nuk e do stagnimin dhe bllokimin

Kryetar i Kuvendit Kadri Veseli, ka theksuar se si gjeneratë nuk janë të thirrur për t’i rregulluar padrejtësisë e së kaluarës, por që të garantohen e tashmja.

Sipas tij kufijtë dhe territori i Kosovës janë të paprekshëm dhe se udhëheqja politike e fqinjësisë së mirë duke mos pasur pretendime territoriale ndaj asnjë shteti tjetër, transmeton Indeksonline.

Ky është postimi i plotë:

Ne si gjeneratë, nuk jemi të thirrur t’i ndreqim padrejtësitë e së kaluarës, por të garantojmë të tashmen dhe të ardhmen e shtetit të Kosovës, të shpallur më 17 Shkurt të vitit 2008.

Ne jemi shtet sovran. Kufijtë dhe territori ynë janë të paprekshëm. Ne udhëhiqemi nga politika e fqinjësisë së mirë dhe nuk kemi pretendime territoriale ndaj asnjë shteti tjetër.

Pavarësia e Kosovës ka fuqizuar paqen, sigurinë dhe demokracinë në rajonin tonë. Të gjithë ne, pavarësisht dallimeve politike, qëndrojmë të bashkuar rreth këtyre parimeve.

Dilemat dhe kundërshtimet rreth shënjimit të kufirit me Malin e Zi duhet të sqarohen në mënyrë që vendi të ecë përpara. Askush nuk e do stagnimin dhe bllokimin.

Vetë interesimi i gjithanshëm që ka ngjallur ky debat e dëshmon këtë. Le të jetë pra ky një fillim ri. Një fillim i përbashkët. Një fillim që do të meritojë të shënohet në fletët ende të pashkruara të historisë sonë. K.V./PrishtinaPress.eu