Banorët e veriut të Kosovës nuk e paguajnë as ujin

Qeveria e Kosovës herë pas here ka subvencionuar Ujësjellësin Rajonal “Mitrovica” për ujin e harxhuar në pjesën veriore të Kosovës dhe nga 12 milionë euro sa është borxhi total i veriut, deri më tani ka mbuluar vetëm rreth 300 mijë euro. Veriut i faturohet uji me çmimin prej 18 centë, gati trefish më ulët se që është çmimi aktual për një metër kub ujë (45 centë)

Ashtu siç nuk kanë paguar kurrë për shpenzimet e energjisë elektrike, qytetarët e veriut të Kosovës, institucionet publike, ndërmarrjet dhe bizneset nuk kanë paguar asnjëherë as për ujin e shpenzuar.

Veriut të Kosovës për çdo muaj i dërgohen rreth 377 mijë metra kub ujë nga fabrika për përpunimin e ujit në Shipol të Mitrovicës. Për 377 mijë metra kub ujë, veriut të Kosovës i faturohen 69.225 euro, ose rreth 800 mijë euro në vit, shkruan ‘Zeri’.

Faturimi nuk bëhet me qëllimin që të mblidhen mjetet për ujin e shpenzuar në atë pjesë, pasi që inkasomi në anën përtej Ibrit është i pamundshëm, por ai bëhet vetëm sa për të ditur se sa metra kub ujë i dërgohen pjesës veriore.